शब्दांशिवाय पत्र | मराठी भावनिक कविता
लिहिले मी पत्र तुला, कोरा कागद घेऊन,
शब्द नाही, अक्षर नाही, फक्त मन ओतून ।।
ओळी नाहीत, वाक्य नाही, नाही कुठली भाषा,
तरीही सांगे सारे काही, मनाची ही आशा ।।
डोळ्यांनी लिहिले जे, शाईने लिहिता येईना,
ओठांवर आले जे, शब्दांत मावता येईना ।।
एक नजर बोलली खूप, जे वर्षे न बोललो,
त्या नजरेच्या पत्रात, आपण दोघे भेटलो ।।
हाताचा एक स्पर्श होता, हजार ओळींसारखा,
थरथरत्या बोटांतून, आला संदेश अनोळखा ।।
सांगितले त्या स्पर्शाने "आहे मी सोबत तुझ्या,"
शब्दांपेक्षा खोल होती, ती भाषा स्पर्शाची सखा ।।
- कवी प्रशांत सर © (संगमनेरकर)
(© या कवितेचे सर्व हक्क सुरक्षित आहेत. लेखकाच्या लिखित परवानगीशिवाय या कवितेचा कोणताही भाग कॉपी, पुनर्प्रकाशित किंवा वापर करता येणार नाही.)
भावार्थ :
या कवितेत मी शब्दांच्या मर्यादा ओलांडून भावनांना व्यक्त करण्याचा प्रयत्न केला आहे. मला जाणवतं की काही भावना अशा असतात, ज्या अक्षरांत मावत नाहीत; त्या डोळ्यांतून, नजरेतून आणि स्पर्शातूनच व्यक्त होतात. म्हणूनच मी कोऱ्या कागदावर पत्र लिहितो. पण त्यात शब्द नसतात, तर मन ओतलेलं असतं. नजरेतून आणि स्पर्शातून जे व्यक्त होतं, ते हजारो शब्दांपेक्षा अधिक प्रभावी असतं, ही माझी अनुभूती आहे. या कवितेत मी सांगतो की खऱ्या नात्यांना भाषेची गरज नसते; कारण जिथे मन जोडलेले असते, तिथे मौनही बोलकं होतं.
📖 अशाच प्रकारच्या कविता वाचण्यासाठी खालील बटनवर क्लिक करा
